Janköýerleriň biri-birinden gyzykly futbol oýunlaryna we transferlere aňk bolup, tomaşa edýän wagtynda, dünýäniň futbol ýyldyzlary başga bir meýdançada–maýa goýum äleminde «şowly pas berip, owadandan owadan gol geçirýärler».
Saglyk we fitnes üçin akylly bilezikleri öndürýän Amerikanyň Whoop kompaniýasy özüne 575 mln dollar maýa goýum çekdi we onuň bahasy eýýäm 10,1 milliard dollara ýetdi. Bu kompaniýanyň paýdarlarynyň arasynda Kriştianu Ronaldu (5 gezek «Altyn topuň» eýesi), Lebron Jems (NBA ýyldyzy), Maýkl Felps (23 gezek Olimpiýa çempiony), Wirdžil wan Deýk («Liwerpul») dagylar hem bar.
Akylly bilezik emeli aňyň kömegi bilen ukyňy, bedeniň nähili dynç alýandygyny we sport agramyny ölçeýän «wirtual tälimçi» bolup hyzmat edýär. Kompaniýa eýýäm enjamy bütin dünýä ýaýramaga we biržada öz paýnamalaryny satmaga taýýarlanýar.
«Real Madridiň» derwezebany Tibo Kortua has üýtgeşik bir ugra –suwdaky elektrikli gämileriň ýaryşyna pul goýdy.
Bu ýaryşlar ýokary tizlikden hem ötri, ekologiýany aýamak babatda hem uly ähmiýete eýedir.
Tslamada Kortuanyň ýanynda Rafael Nadal, Tom Bredi we Will Smit ýaly meşhurlaryň hem öz toparlary bar. Şeýlelikde türgenler indi diňe bir brendleriň ýüzi bolman, ýuwaş-ýuwaş olaryň eýelerine-de öwrülip barýarlar.
Mysal üçin aýtsak, Ronaldu Ispaniýanyň «Almeriýa» klubynyň 25%-ini satyn aldy, IT-taslamalara, iýmit markalaryna maýa goýdy we hatda öz kino studiyasyny hem açdy. Lebron Jems Media kompaniýalardan başlap, uly sport holdinglerine çenli dolandyrýar.
Tibo Kortua bolsa suw ýaryşlaryndan başga-da, kiber-sporta we sport binalaryna pul goýýar.
Gysgaça aýtsak, sport indi diňe stadiona sygmaýar. Ol häzirki wagtda tehnologiýalaryň, akylly gurallaryň we ägirt uly pullaryň aýlanýan ýerine döndi. Häzirki zaman türgeni üçin edil meýdançadaky ýeňiş ýaly, dogry edilen biznes maýa goýumy-da şonça möhümdir.
