Alymlar tarapyndan emeli usulda döredilen «tirannozawryň derisinden» ýasalan dünýädäki ilkinji ýantorba 660 müň dollar başlangyç baha bilen auksiona çykarylar. Bu material ýöne bir öýkünme däl: ol ýok bolup giden ýyrtyjynyň gaýtadan dikeldilen kollageniniň esasynda döredildi.
T-Rex Leather taslamasy «VML», «The Organoid Company» we «Lab-Grown Leather» kompaniýalarynyň bilelikdäki ylmy işiniň netijesidir, önümiň dizaýnyny bolsa «Enfin Levé» brendi işläp düzdi.
Derini öndürmek üçin alymlar daşlaşan galyndylarda saklanyp galan tirannozawryň kollagen yzygiderliligini ulandylar. Hasaplaýyş biologiýasynyň we emeli aňyň kömegi bilen doly DNK sintezlendi we ol göteriji öýjüklere ornaşdyryldy.
Emeli meňzeşliklerden tapawutlylykda, öňdebaryjy dokuma inženeriýasy (ATEP) tehnologiýasy ösdürilip ýetişdirilen öýjüklere tebigy gurluşy emele getirmäge mümkinçilik berýär. Netijede, haýwanlara we tokaýlara zeper ýetirmezden döredilen, tebigy deri bilen birmeňzeş bolan, biodargaýan we çydamly material alynýar.
Öndürijiler bu nusganyň ýeke-täk bolup galmajakdygyny mälim edýärler. Kompaniýalaryň meýilnamasynda — T-Rex Leather derisini öndürmegi dowam etdirmek we dürli brendler bilen hyzmatdaşlyk etmek bar. Geljekde 68 million ýyllyk genetiki maglumatlaryň esasynda döredilen bu materialyň diňe bir moda pudagynda däl, eýsem awtoulaglaryň içki bezeginde we beýleki senagat ugurlarynda hem ulanylmagyna garaşylýar.
