Geçen hepdede Türkmenistanyň Döwlet haryt-çig mal biržasynyň söwdalarynda 26 sany geleşik hasaba alyndy. Eksport amallarynyň umumy möçberi 4 million ABŞ dollaryndan geçdi.
Daşary ýurt puluna BAE-niň, Owganystanyň, Gruziýanyň we Özbegistanyň işewür toparlarynyň wekilleri «Türkmennebit» döwlet konserninde öndürilen binýatlyk ýagy we polipropileni satyn aldy.
Şeýle hem daşary ýurt puluna nah ýüplük, bugdaý uny, buýan köküniň ekstrakty we ýorgan-düşek daşlyklarynyň toplumlary ýerlenildi. BAE-niň, Türkiýäniň we Serbiýanyň telekeçiler alyjylar hökmünde çykyş etdi.
Içerki bazar üçin türkmen telekeçileri binýatlyk ýagy we polipropileni, «Türkmengaz» döwlet konserninde öndürilen tehniki kükürdi, şeýle hem bugdaý ununy, pagta soapstogynyň çig ýagly turşulygyny, nah matany we dokma önümleriniň galyndylaryny satyn aldy. Içerki geleşikleriň umumy möçberi 124 million 806 müň manatdan geçdi.
