Häzirki wagtda Aşgabatda 500 orunlyk Şehitler metjidini döwrebaplaşdyrmak boýunça işler alnyp barylýar. Bu mesele Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň Arkadag şäherindäki ştab-kwartirasynda geçirilen maslahatda ara alnyp maslahatlaşyldy diýip, «Watan» habarlar gepleşiginde habar berildi.
Alnyp barylýan işler barada Gaznanyň wise-prezidenti R.Bazarow Halk Maslahatynyň Başlygy Gurbanguly Berdimuhamedowyň Arkadag şäherine amala aşyran saparynyň dowamynda hasabat berdi.
Şeýle hem Bazarow türkmen gurluşykçylary tarapyndan Azerbaýjanyň Fizuli şäherinde bina edilýän metjidiň gurluşyk we bezeg işleri barada maglumat berdi.
Halk Maslahatynyň Başlygy paýtagtymyzdaky metjidi döwrebaplaşdyrmagyň çäklerinde onuň namaz okalýan ýeriniň giňeldilendigini belledi we gurluşyk hem-de bezeg serişdeleriniň hiline aýratyn üns bermegiň zerurdygyny nygtady. Şonuň bilen birlikde, ol Azerbaýjanda gurlup ulanylmaga beriljek metjidiň bezeg işlerini geçirmekde ýerli ýaşaýjylaryň pikirleriniň göz öňünde tutulmagynyň ähmiýetine ünsi çekdi.
