Şu ýyl Gyrgyzystanda geçiriljek 6-njy Bütindünýä çarwadarlar oýunlarynyň resmi tumary yglan edildi. Ol güýjüň hormat goýmak bilen utgaşýandygyny, däp-dessurlaryň bolsa dünýä açykdygyny görkezýän gar barsy boldy diýip, Bütindünýä çarwadarlar oýunlarynyň halkara sekretariatyna salgylanyp, Gyrgyzystanyň «Kabar» milli habarlar agentligi habar berýär.
«Gar barsy diňe bir tumar däl-de, eýsem, kabul ediji ýurduň häsiýetini we 2026-njy ýyldaky Bütindünýä çarwadarlar oýunlarynyň sport, medeniýet hem-de bilim arkaly adamlary birleşdirýän halkara platforma hökmündäki gymmatlyklaryny açyp görkezýän keşpdir» – diýip, sekretariat belleýär.
Habar berlişi ýaly, tumaryň wizual keşbi Gyrgyzystanyň tebigatyny, çarwa mirasyny we taslamanyň döwrebap öwüşginini özünde jemleýär.
Bütindünýä çarwadarlar oýunlary dünýäniň çarwa halklarynyň etnik sport görnüşlerini we däp bolan medeniýetini saklamaga, ösdürmäge hem-de wagyz etmäge gönükdirilen halkara medeni-sport çäresidir. Olar ilkinji gezek 2014-nji ýylda Gyrgyzystanda geçirildi. Ondan soňra 2016-njy we 2018-nji ýyllarda 2-nji we 3-nji Oýunlar hem şol ýurtda guraldy. 4-nji oýunlar 2022-nji ýylda Türkiýede, 5-nji oýunlar bolsa 2024-nji ýylda Gazagystanda geçdi.
6-njy Bütindünýä çarwadarlar oýunlary şu ýyl 31-nji awgustdan 6-njy sentýabr aralygynda geçiriler. Açylyş dabarasy Gyrgyzystanyň paýtagty Bişkekde bolar, esasy sport we medeni çäreler bolsa Yssykkölde guralar. Oýunlaryň maksatnamasyna etnosportuň 43 görnüşi, şeýle hem medeni we ylmy çäreler girýär.
