«Merkezi Aziýada zenanlaryň arasynda köpçülikleýin triatlon sportuny ösdürmäge gönükdirilen «She.Tri» platformasy işe girizildi. Taslamanyň tanyşdyrylyş dabarasy 20-nji martda Gazagystanyň metbugat klubynda geçirildi» diýip, CMN.KZ habar berýär.
Başlangyjyň sebäpkärleri Gazagystanyň, Gyrgyzystanyň we Özbegistanyň zenan triatlonçylarydyr. Täze platformanyň çägindäki sport ýaryşlaryny Almaty, Bişkek, Daşkent we Samarkand şäherlerinde geçirmek meýilleşdirilýär.
«Trigada» jemgyýetini esaslandyryjy we «Almaty Marathon» taslamanyň ýerine ýetiriji direktory Saltanat Kyzybaýewanyň sözlerine görä, 2024-nji ýylyň Olimpiada oýunlarynda erkekler bilen zenanlaryň gatnaşygy ilkinji gezek deňleşen-de bolsa (50/50), köpçülikleýin sportda zenanlaryň paýy entegem pesligine galýar.
Saltanat Kyzybaýewa Gazagystanda «Almaty Marathon» ýaryşyna gatnaşýan zenanlaryň sanynyň 2012-nji ýyldaky 30%-den, 2025-nji ýylda 45%-e çenli ýokarlanandygyny belledi. Emma triatlon babatda bu görkezijiler Gazagystanda takmynan 20%, Gyrgyzystanda binalaryň içinde 27,7%, açyk howada 19%, Özbegistanda 29% derejede bolmak bilen, görnetin azdyr.
Içinde ylgawyň, ýüzmegiň hem welosiped sürmegiň bardygy üçin köp zenanlar triatlony agyr sport hasaplaýarlar. Şeýle-de olaryň käbiri alaň-açyk suwda ýüzmekden çekinse, beýlekiler bu sport üçin hökman gymmat bahaly, aýratyn bir görnüşli welosiped gerekdir diýip pikir edýärler. Emma taslama ýolbaşçylary binalaryň içinde geçirilýän görnüşiň hem bardygyny we bu sportuň beýle bir agyr däldigini düşündirýärler.
«She.Tri» platformasynyň ilkinji ýaryşy eýýäm 8-nji martda Bişkekde ýapyk bina görnüşinde geçirildi. Onuň çäginde ýörite lybas bäsleşigi-de guraldy. Ýaryşyň guramaçylyk hysyrdylarynam, eminlik işlerinem zenanlaryň özleri ýerine ýetirdi.
