«Icelandair» awiakompaniýasy bäsleşik yglan etdi. Onuň ýeňijisi Islandiýa 10 gün syýahat etmäge mümkinçilik gazanar. Taslamanyň maksady hatda tejribesiz adamyň hem bu ýurtda gowy suratlary düşürip biljekdigini görkezmekden ybarat diýip, «Euronews» habar berýär.
Guramaçylar häzirki wagtda her bir adamda diýen ýaly kameranyň bardygyny, emma munuň ýokary hilli suratlary kepillendirmeýändigini belleýär. Köp adamlar düşürilen suratlaryň bulaşyk çykmagy ýa-da şowsuz rakurslar ýaly kynçylyklar bilen ýüzbe-ýüz bolýar.
«Really bad photographer» (hakykatdan hem erbet fotosuratçy) atly kampaniýanyň çäklerinde kompaniýa professional tejribesi we surata düşürmäge uly höwesi bolmadyk gatnaşyjyny gözleýär. Şunda dalaşgär adam suratlarda we wideolarda görünmäge, şeýle hem açyk howadaky işjeň çärelere gatnaşmaga taýyn bolmalydyr.
Ýeňijiniň uçuş we yzyna gaýdyş tölegleri, ýaşajak ýeri we şahsy çykdajylary üçin serişdeleri tölener. Mundan başga-da, döredilen kontent üçin 43 000 ýewro möçberinde sylag göz öňünde tutulýar.
Gatnaşmak üçin 21 ýaşdan uly bolmak, güýji bolan pasportyň we Islandiýa, Beýik Britaniýa hem-de ABŞ-a syýahat etmäge mümkinçiliginiň bolmagy zerurdyr.
Arzalary ýörite saýtyň üsti bilen tabşyryp bolýar, onda öz ukyplaryň barada alty sany sowala jogap bermeli. Goşmaça hökmünde, gatnaşyjylar näme üçin hut özleriniň bu taslama laýyk gelýändiklerini düşündirýän gysga wideo hem iberip biler.
