4-nji aprelde sagat 00:52-de (Aşgabat wagty bilen) Owganystanyň Hindiguş daglyk sebitinde ýertitreme boldy. Bu barada «TOLO News Plus» teleýaýlymy habar berýär.
Çeşmäniň maglumatyna görä, Kabulda ýaşaýyş jaýy weýran bolup, onuň astynda adamlar galdy. Azyndan sekiz adam wepat boldy, bir çaga bolsa şikes aldy.
Ýertitremäniň merkezi Owganystanyň demirgazyk-gündogarynda, Badahşan welaýatynda ýerleşdi. Ýerasty sarsgynlaryň güýji dürli çaklamalara görä, takmynan, 5,8–6,0 bala deň boldy. Sarsgynlaryň merkezi, takmynan, 190–200 kilometr çuňlukda ýerleşip, bu ýagdaý yrgyldylaryň uzak aralyklara ýaýramagyna sebäp boldy. Sarsgynlar Pakistan, Özbegistan, Gyrgyzystan, Täjigistan we Gazagystan ýaly ýurtlarda hem duýuldy. Käbir sebitlerde olaryň güýji 2–3 bala ýetdi.
Bu ýurtlarda seýsmik wakalar eýýäm iki gün yzygiderli hasaba alynýar. Olaryň biriniň merkezi (3-nji aprelde sagat 15:26-da bolan) Täjigistanda ýerleşip, onuň güýji 5,5 bala, çuňlugy bolsa 10 kilometre deň bolupdy.
Hindiguş sebiti seýsmik taýdan işjeň zolak hasaplanýar. Bu ýerde tektonik gatlaklaryň hereketi sebäpli ýertitremeler yzygiderli bolýar we olar ojagyndan has uzak aralyklarda hem duýulýar.
