Türkmenistanyň Prezidenti Serdar Berdimuhamedow anna güni sanly ulgam arkaly Ministrler Kabinetiniň mejlisini geçirdi. Onda 2026-njy ýylyň ýanwar—mart aýlarynda ýerine ýetirilen işleriň jemleri jemlendi diýip, «Watan» habarlar gepleşiginde habar berildi.
Berlen hasabatlara görä, hasabat döwrüniň netijeleri boýunça jemi içerki önümiň ösüşi 6,3% boldy.
Üç aýyň dowamynda öndürilen önümleriň möçberi 10,4% artdy. Ösüş depgini senagatda — 2,4%, gurluşykda — 6%, ulag we aragatnaşykda — 10,3%, söwdada — 8,3%, oba hojalygynda — 2,4%, hyzmatlar ulgamynda bolsa 8,3% boldy.
Bölek satuw haryt dolanyşygy 10,4%, daşary söwda dolanyşygy bolsa 3,7% artdy. Döwlet býujetiniň girdeji bölegi 102,3%, çykdajy bölegi bolsa 97,2% ýerine ýetirildi. Özleşdirilen maýa goýumlaryň möçberi 5,3% ýokarlandy.
Nebitgaz pudagynda nebit çykarmak boýunça meýilnama 106,9%, ony gaýtadan işlemek boýunça meýilnama bolsa 108,7% ýerine ýetirildi. Benzin öndürmek 119%, dizel ýangyjyny öndürmek 111,8%, suwuklandyrylan gazy öndürmek bolsa 126,7% boldy. Tebigy we ugurdaş gazy çykarmagyň meýilnamasy 107,5% derejesinde berjaý edildi.
Oba hojalygynda önümçiligiň ösüş depgini 106% boldy, maýa goýumlary özleşdirmegiň meýilnamasy bolsa 168,1% ýerine ýetirildi. Häzirki wagtda möwsümleýin işler, ekinlere ideg etmek we ekiş möwsümi dowam edýär.
Gurluşyk we senagat toplumynda meýilnamanyň ýerine ýetirilişi 128,2% boldy, ulag-kommunikasiýa toplumynda ösüş 114,1% boldy. Ýük daşamagyň möçberi 102,7%, ýolagçy gatnatmagyň möçberi bolsa 102,9% artdy.
Durmuş ulgamynda bilim, ylym, saglygy goraýyş we sport pudaklaryny ösdürmek çäreleri dowam edýär, döwrebap tehnologiýalar ornaşdyrylýar, halkara çäreleri we bäsleşikleri geçirilýär. Hasabat döwri ýurduň durmuşynda baýramçylyk dabaralary we möhüm wakalar bilen utgaşdy.
Daşary syýasatda Türkmenistan daşary ýurtlar we halkara guramalary bilen hyzmatdaşlygy ösdürmegini dowam etdirýär, duşuşyklar, gepleşikler we bilelikdäki çäreler amala aşyrylýar.
Prezident Serdar Berdimuhamedow kanunçylygy has-da kämilleşdirmegiň, ykdysadyýeti durnukly ösdürmegiň we kabul edilen maksatnamalary netijeli durmuşa geçirmegiň zerurdygyny belledi.
Döwlet Baştutany ykdysadyýetiň durnukly ösüşini, býujet serişdeleriniň netijeli ulanylmagyny üpjün etmegi, energiýa serişdeleriniň çykarylyşyny artdyrmagy, oba hojalygyny ösdürmegi, senagaty döwrebaplaşdyrmagy, daşary ykdysady gatnaşyklary berkitmegi we ulag düzümini kämilleşdirmegi tabşyrdy.
Mejlisiň dowamynda döwlet durmuşyna degişli beýleki meselelere hem seredildi we degişli çözgütler kabul edildi.
