Hytaýyň demirgazyk-günbatarynda iri şahly mallaryň iki sürüsinde agsyl keseliniň ýaýramagy hasaba alyndy. Bu barada Hytaý Halk Respublikasynyň Oba hojalygy ministrligine salgylanyp, «Reuters» agentligi habar berýär.
Kesel Gansu welaýatynda we Sinszýan-Uýgur awtonom sebitinde ýüze çykaryldy. Jemi 6222 başdan ybarat bolan iki sürüde 219 sany malyň keselländigi anyklandy.
Mallarda agsyl wirusynyň SAT1 serotipi tapyldy. Agentligiň maglumatyna görä, Hytaýda öndürilen sanjymlar bu görnüşe garşy täsirli däl. Ýurtda bu görnüş ilkinji gezek ýüze çykarylýar.
Sebitleriň häkimiýetleri keseliň ýaýramagynyň öňüni almak üçin çäreleri görýär: kesellän mallary soýmak we dezinfeksiýa işleri alnyp barylýar.
Sinszýan sebiti Russiýanyň Altaý Respublikasy bilen serhetleşýär. Bu sebitde 2025-nji ýylyň ahyryndan bäri mallaryň arasynda keselleme ýagdaýlary hasaba alynýar. «Izwestiýa» neşiriniň maglumatlaryna görä, Sibirde 2026-njy ýylyň fewral-mart aýlarynda karantin çäreleri 87,5 müňden 90,5 müňe çenli mala degişli boldy.
