Gazagystanyň Aýagöz şäherindäki 10-njy mekdep-gimnaziýanyň 10-njy synp okuwçysy Aružan Kabdulmaratowa plastik galyndylaryny gaýtadan işläp, ýol gurluşygynda ulanmagyň täze usulyny hödürledi. Bu barada BAQ.kz saýty habar berýär.
Teklip edilýän usula görä, plastik galyndylary ýörite işlenilip, asfaltyň düzümine garylyp ulanylýar. Bu bolsa ýoluň çydamlylygyny we könelmezlige garşy durnuklylygy artdyrýar.
Hasaplamalara görä, şeýle ýol örtügi 12–18 ýyllap, amatly şertlerde bolsa 20–25 ýyla çenli öz hilini ýitirmeýär. Munda adaty ýol gurluşyk tehnologiýalaryna garanyňda, önümçilik çykdajylary hem ep-esli peselýär.
Okuwçy gyz ýollaryň ýagdaýyna gözegçilik etmek üçin biri zeperi anyklaýan, beýlekisi bolsa ony düzedýän iki görnüşli roboty ulanmagy teklip edýär.
Aslynda plastik galyndylaryny ýol gurluşygynda ulanmak täze pikiriem däl.
2017-nji ýylda Şotlandiýanyň MacRebur kompaniýasy Angliýanyň demirgazyk-günbatarynda ilkinji plastik garyndyly ýoly gurdy. Bu taslamanyň awtory inžener Tobi Makkartni Hindistandaky ýaşaýjylaryň ýoldaky çukurlary plastik galyndylaryny ýakyp doldurýandyklaryny görenden soň bu ideýany ösdürmek kararyna gelýär.
