Londonyň Tebigy taryh muzeýiniň alymlary itleriň adamlaryň durmuşyna azyndan 15 müň ýyl ozal aralaşandyklaryny anykladylar. Bu görkeziji öňki çaklamalardan takmynan bäş müň ýyl irki döwre degişlidir. Barlagyň netijeleri Nature žurnalynda çap edildi.
Hünärmenleriň şeýle netijä gelmegine Angliýanyň Somerset graflygyndaky Gof gowagyndan tapylan äň süňküniň düýpli seljerilmegi sebäp boldy. Genetik barlaglar bu galyndylaryň iň gadymy öý itleriniň birine degişlidigini görkezdi.
Gyzykly ýeri, bu süňk, baryp 1920-nji ýyllarda tapylypdy. Ýöne näme üçindir muzeýde oňa uzak wagtlap üns berilmedi. Diňe ýakynda geçirilen DNK seljermesi onuň hakyky gelip çykyşyny mälim etdi.
Genetik maglumatlar Ýewropanyň beýleki ýerlerinde we Anatoliýada hem meňzeş nusgalaryň bardygyny ýüze çykardy. Munuň özi itleriň soňky buzluk döwrüniň ahyrynda (20-11,7 müň ýyl ozal) adamlar bilen bilelikde dünýä ýaýrandygynyň alamatydyr.
Himiki seljermeler itleriň we adamlaryň şol döwürlerde meňzeş iýmitler – et, balyk we ösümlik önümleri bilen iýmitlenendigini subut etdi.
Indi alymlar ilkinji itler adamlaryň düşelgeleriniň golaýynda mesgen tutup başlan we kem-kemden adamlaryň gurşawyna öwrenişen çal möjeklerden gelip çykandyr diýip güman edýärler.
