79-njy Kann kinofestiwaly režissýor Pýer Salwadoriniň «Elektrikli Wenera» («Электрическая Венера») atly komediýasy bilen açylar. Filmiň görkezilişi 12-nji maýda – dabaraly açylyş gününde bolar.
Filmde suratlandyrylýan waka 1920-nji ýyllardaky Parižde bolup geçýär. Onuň baş gahrymany Antuan atly nakgaş aýaly ýogalandan soň döredijilik ylhamyny ýitirýär. Ol aýaly bilen habarlaşmak üçin ruhlar bilen gepleşýän mediuma ýüz tutýar. Emma ol özüni medium diýip tanadan zenanyň öýkünjeň karnawalçydygyny aňmaýar. Wagtyň geçmegi bilen, şol zenan nakgaşa göwün berip başlaýar.
Filmdäki beýleki esasy rollary Pio Marmaý, Anais Demustýe we Žil Lelluş ýerine ýetirýär. Kann kinofestiwaly 12-nji maýdan 23-nji maýa çenli dowam eder.
Bu ýylky bäsleşigiň eminler toparyna günorta koreýaly režissýor Pak Çhan Uk («Oldboý», «Aýyrmak usuly») ýolbaşçylyk eder. Ol bu wezipe ynanylan Günorta Koreýanyň ilkinji, Aziýanyň bolsa üçünji wekilidir.
Festiwalyň hormatly «Altyn palma şahasyny» meşhur režissýor Piter Jeksona («Ýüzükleriň hökümdary», «Hobbit») we aktrisa hem-de aýdymçy Barbra Streýzanda gowşurarlar.
