Alymlar stressiň deridäki çişme proseslerini işjeňleşdirmek arkaly ekzemanyň alamatlaryny nähili güýçlendirýändigini anykladylar. Bu barlagyň netijeleri Science žurnalynda çap edildi.
Barlagyň awtorlary stressiň deriniň immun öýjüklerine täsir edýän we çişmäni güýçlendirýän neýronlar toparyny işjeňleşdirýändigini anykladylar. Fudan uniwersitetinden, barlagyň awtorlarynyň biri Şenbin Lýunyň sözlerine görä, bu "psihologik stress ýaly duýgynyň biologiki üýtgeşmelere, ýagny deriniň çişmegine nädip sebäp bolup biljekdigini" düşündirýär.
Bu barlag atopiki dermatitli 51 adamyň maglumatlarynyň seljermesine esaslanýar. Stress derejesi ýokary bolan gatnaşyjylarda deri çişmesi has güýçli bolup, çişme reaksiýalaryny güýçlendirýän immun öýjükleri bolan eozinofilleriň derejesi ýokarlandy.
Alymlar öz netijelerini barlamak üçin dermatit alamatlary bolan syçanlarda tejribe geçirdiler. Strese duçar bolan haýwanlarda gijilewük we çişme artdy, deridäki eozinofilleriň sany bolsa gözegçilik toparyndakylaryňka garanyňda dört esse ýokary boldy.
Goşmaça seljerme strese jogap berýän neýronlaryň bu öýjükleri derä çekýän beloklary bölüp çykarýandygyny görkezdi. Bu neýronlaryň petiklenmegi ýagdaýyň beterleşmeginiň öňüni aldy, bu bolsa barlagçylaryň pikirine görä, täze bejeriş usullarynyň esasyny düzüp biler.
