Arkadag şäherinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça Haýyr-sahawat gaznasynyň döredilmeginiň 5 ýyllygy mynasybetli dabaraly çäre geçirildi.
Gazna Türkmenistanyň Prezidentiniň 2021-nji ýylyň 29-njy martyndaky Karary bilen döredilipdi. Döredilen gününden bäri ol hemaýata mätäç çagalara, ilkinji nobatda bolsa saglyk we ösüş meselelerinde ýardam berip gelýär.
Dabaraly çäräniň başynda gatnaşyjylara Prezident Serdar Berdimuhamedowyň Gutlagy okaldy. Onda ene we çaga saglygyny goramagyň, şeýle hem ösüp gelýän ýaş nesli terbiýelemegiň döwlet syýasatynyň ileri tutulýan ugurlarynyň biri bolup galýandygy nygtaldy.
Dabaranyň dowamynda haýyr-sahawat işlerini ösdürmäge goşant goşan şahsyýetleri sylaglamak baradaky döwlet Baştutanynyň Permany yglan edildi. Gaznanyň bejeriş işleri boýunça wise-prezidenti Oguljahan Atabaýewa BMG-niň Ösüş maksatnamasynyň Türkmenistandaky hemişelik wekili Narine Saakýana we ÝUNISEF-iň Türkmenistandaky wekili Jalpa Ratna «Arkadag» medalyny gowşurdy.
Sylaglanan wekiller öz minnetdarlyk sözlerinde Gaznanyň çagalary goldamakda we ynsanperwer başlangyçlary ösdürmekde tutýan ornuny belledi. Gazna tarapyndan amala aşyrylýan haýyr-sahawat maksatnamalarynyň netijesinde ýüzlerçe çaganyň lukmançylyk kömegini alandygy, hususan-da, çylşyrymly operasiýalaryň geçirilýändigi, bejergi-dikeldiş we öňüni alyş hyzmatlarynyň üpjün edilýändigi barada nygtaldy.
Mundan başga-da, Gazna daşary ýurtly hyzmatdaşlar bilen işjeň gatnaşyk saklaýar. ÝUNISEF, Sun Sinlin adyndaky gazna we Geýdar Aliýew adyndaky gazna bilen ylalaşyklara gol çekildi.
Çäre ýurduň sungat ussatlarynyň we çagalar toparlarynyň gatnaşmagyndaky konsert maksatnamasy bilen tamamlandy. Baýramçylyk konsertiniň dowamynda dünýä meşhur daşary ýurt eserleri hem ýerine ýetirildi.
Dabaranyň gatnaşyjylary Prezident Serdar Berdimuhamedowyň adyna Minnetdarlyk ýüzlenmesini kabul etdi.
