26-njy martda Aşgabatda gender deňligini ilerletmek we onuň kanunçylyk esaslaryny berkitmek boýunça parlamentara dialoga bagyşlanan maslahat geçirildi. Oňa Mejlisiň deputatlary, ministrlikleriň we pudaklaýyn dolandyryş edaralarynyň, halkara guramalaryň wekilleri, şeýle hem birnäçe ýurtlaryň wekiliýetleri gatnaşdy.
Çäre Türkmenistanyň Mejlisi tarapyndan BMG-niň Ilat gaznasy (UNFPA) bilen bilelikde guraldy. Açylyş dabarasynda Mejlisiň Başlygy Dünýägözel Gulmanowa, UNFPA-nyň Gündogar Ýewropa we Merkezi Aziýa boýunça sebitleýin direktory Florens Bauer, şeýle hem halkara guramalaryň we diplomatik wekilhanalaryň wekilleri çykyş etdi.
«Bu halkara maslahat Türkmenistanyň gender deňligini üpjün etmekde gazanan oňyn tejribesini paýlaşmak we täze tejribeleri öwrenmek, öňe sürülýän başlangyçlary hem-de bu ugurda hyzmatdaşlygy ösdürmegiň, tagallalary birleşdirmegiň meselelerini ara alyp maslahatlaşmak üçin ähmiýetli meýdança bolup hyzmat eder» – diýip, Mejlisiň Başlygy belledi.
Gatnaşyjylar gender deňligini üpjün etmek boýunça halkara tejribesini we ileri tutulýan ugurlary, kanunçylygy ösdürmegi, zenanlaryň hukuklaryny giňeltmegi we parlamentara hyzmatdaşlygy işjeňleşdirmegi maslahatlaşdy. 2026–2030-njy ýyllar üçin gender deňligini üpjün etmek boýunça Hereketleriň milli meýilnamasyny durmuşa geçirmäge, şeýle hem zenanlaryň hukuklaryny goramak mehanizmlerini kämilleşdirmäge aýratyn üns berildi.
Maslahatyň çäklerinde halkara kadalaryny durmuşa geçirmekde we hyzmatdaşlygy ösdürmekde parlamentarileriň tutýan orny bilen bagly meselelere garaldy. Halkara guramalar, şol sanda UNFPA bilen özara gatnaşyklaryň ähmiýeti nygtaldy.
Duşuşygyň jemleri boýunça gatnaşyjylar şeýle çäreleriň dowam etdirilmeginiň we parlamentara dialogyň ösdürilmeginiň tarapdary bolup çykyş etdi.
