25-nji martda Türkmenistanyň daşary işler ministriniň orunbasary Mähri Bäşimowanyň Ýewropa Komissiýasynyň Halkara hyzmatdaşlygy boýunça Baş müdirliginiň (DG INTPA) Merkezi Aziýa we Owganystan boýunça bölüminiň ýolbaşçysy Şarlotta Adrian bilen duşuşygy boldy.
Taraplar Türkmenistan bilen Ýewropa Bileleşiginiň arasyndaky hyzmatdaşlygy ösdürmegiň meselelerini ara alyp maslahatlaşdy. Söwda-ykdysady gatnaşyklara hem-de Merkezi Aziýa bilen ÝB-niň arasyndaky ulag-üstaşyr ugurlaryny ösdürmäge aýratyn üns berildi.
Energetika ulgamyndaky özara hereketleriň meselelerine aýratyn garaldy. Hereket edýän formatdaky dialogy dowam etdirmäge, şeýle hem ýaşyl ösüş we howanyň üýtgemegi bilen bagly gün tertibi ugurlary boýunça hyzmatdaşlygy giňeltmäge bolan özara gyzyklanma bellenilip geçildi.
Şeýle-de, medeni-ynsanperwer hyzmatdaşlygyň meseleleri maslahatlaşyldy. Gepleşikleriň dowamynda ýaşlary goldamaga, durnukly energetika, söwda we sanly aragatnaşyga gönükdirilen ÝB-niň maksatnamalaryny we taslamalaryny durmuşa geçirmek barada gürrüň edildi.
Duşuşygyň netijeleri boýunça taraplar hyzmatdaşlygy ikitaraplaýyn formatda, şeýle hem «Merkezi Aziýa — Ýewropa Bileleşigi» dialogynyň çäklerinde berkitmäge ygrarlydyklaryny tassyklady.
