Philips kompaniýasy 100 ýyllyk ýubileýi mynasybetli nusgawy «Moving Sound» seriýasynyň gaýtadan dikeldilýändigini yglan etdi we 1980-nji ýyllaryň retro-stiline meňzedilen dizaýnly göçme kolonkalary hem-de gulaklyklary hödürledi.
Täze önümleriň arasynda «Tube» atly göçme kolonka bar. Görnüşi boýunça ol geçmişiň bumbokslaryny ýada salýar we şol bir wagtda özboluşly dizaýnyny saklap galýar. Enjamyň kuwwaty 140 Wt deňdir. Onuň gapdallarynda diametri takmynan 130 mm bolan iki sany giň zolakly dinamik, şeýle hem iki sany 19 mm-lik ýokary ýygylykly dinamik ýerleşdirilipdir. Kolonka açyk sary reňkde bolup, uly dolandyryş düwmeleri bilen enjamlaşdyrylan. Şeýle hem ol IP67 standarty boýunça suwdan goraglydyr we 24 sagada çenli zarýadsyz işläp bilýär. Enjamyň ölçegleri — 510 × 200 × 165 mm, bahasy bolsa — 350 ýewro.
Mundan başga-da, kuwwaty 60 Wt bolan has ykjam «Roller» kolonkasy hem hödürlendi. Onuň bahasy 180 ýewro deňdir.
Bu tapgyra «Ringo Duo» gulaklyklary hem goşuldy. Olar hem şol sary reňkde bolup, 40 mm-lik dinamikler bilen enjamlaşdyrylandyr we zarýad bermezden 26 sagada çenli işläp bilýär. Bu modeliň bahasy — 35 ýewro.
