2026-njy ýylyň 23-nji martynda Türkmenistanyň Ýaponiýadaky ilçisi A. Baýramowyň «Green EXPO 2027 Yokohama» halkara bagbançylyk sergi assosiasiýasynyň Baş sekretary Masato Komura bilen duşuşygy geçirildi. Bu barada Türkmenistanyň DIM-i habar berýär.
Gepleşikleriň esasy mowzugy 2027-nji ýylyň 19-njy martyndan 26-njy sentýabry aralygynda Ýaponiýanyň Ýokogama şäherinde geçiriljek halkara bagbançylyk sergisine Türkmenistanyň gatnaşmagy bilen bagly meseleler boldy.
Duşuşygyň barşynda bu abraýly çärä Türkmenistanyň gatnaşmagyny utgaşdyrmak üçin Türkmenistanyň Söwda-senagat edarasynyň baş komissariat hökmünde bellenendigi barada habar berildi.
Masato Komura Türkmenistanyň bu halkara sergä gatnaşmak meýilleri üçin minnetdarlyk bildirdi. Ýapon tarapy ýurduň sergä üstünlikli gatnaşmagyny üpjün etmek üçin ähli zerur goldawlary bermäge taýýardygyny nygtady.
