Türkmenistanda Bilim ministrligi tarapyndan taýýarlanan «Geljegiň hünärleriniň atlasy» atly gollanma neşir edildi. Bu kitap Türkmen döwlet neşirýat gullugy tarapyndan çykaryldy.
Bu atlas Türkmenistanyň Prezidentiniň 2025-nji ýylyň 17-nji oktýabryndaky 1570-nji Karary bilen tassyklanan Ýokary hünär bilimini ösdürmegiň 2026–2052-nji ýyllar üçin Strategiýasyna laýyklykda işlenip düzüldi.
Resminamada häzirkizaman talaplaryny göz öňünde tutmak bilen, hünärmenleri taýýarlamak ulgamyny ösdürmegiň çemeleşmeleri öz beýanyny tapdy. Ykdysadyýetiň sanlylaşdyrylmagy we zähmet bazaryndaky üýtgeşmeler şertlerinde bilim hyzmatlarynyň täze görnüşleriniň hödürlenmeginiň hem-de XXI asyrda isleg bildirilýän başarnyklary ösdürmegiň aýratyn ähmiýete eýedigi bellenilýär.
Atlas gysga we orta möhletli geljekde haýsy pudaklaryň we hünärleriň işjeň kemala geljekdigine, zähmet bazarynda haýsy hünärlere zerurlygyň boljakdygyna düşünmäge ýardam berer. Şeýle hem ol geljekde haýsy tehnologiýalaryň, önümleriň we dolandyryş çözgütleriniň zähmet bazaryny emele getirjekdigi barada maglumat almaga kömek edýär.
