Tesla kompaniýasy Model Y elektrik ulagyny doly sökülen görnüşde görkezdi. Kompaniýa onuň gurluşynyň we esasy tehnologik çözgütleriniň syryny açdy.
Bu ädimi bilen Tesla gigakasting tehnologiýasyna üns çekýär — ol uly iri galyplaýjy maşynlary ulanýar, bu bolsa kuzowyň uly böleklerini birgiden böleklerden ýygnamagyň ýerine, bir bitewi görnüşde öndürmäge mümkinçilik berýär. Bu awtoulagyň agramyny azaldýar, ýygnamak prosesini ýeňilleşdirýär we mümkin bolan näsazlyklaryň sanyny azaldýar.
Sökülen modelde batareýanyň ýerleşdirilişi, ýönekeýleşdirilen sowadyş ulgamy we salonyň minimalistik gurluşy hem görkezilýär. Içinden otlanýan hereketlendirijili ulaglar bilen deňeşdirilende, onuň bu gurluşy o diýen çylşyrymly görünmeýär, bu bolsa tehniki taýdan hyzmat edilişine we ygtybarlylygyna täsir edýär.
Awtoulag öndürijileriň arasynda dizaýnyň şeýle açyk görkezilişi seýrek duş gelýär. Kompaniýa esasan diňe taýýar önümi däl, eýsem onuň gerekmejek elementlerini aýyrmaga we dizaýny ýönekeýleşdirmäge esaslanýan önümçilige ýykgyn edilýänini hem görkezýär.
Gurluşy köp derejede içinden otlanýan hereketlendirijili ulaglaryň häsiýetlerini saklaýan Toyota, Volkswagen we Ford ýaly däp bolan awtoulag öndürijileri bilen deňeşdirilende, Tesla-nyň çemeleşmesi has radikal görünýär. Bu bolsa alyjylaryň saýlawlaryna täsirini ýetirýär, sebäbi ulagyň arhitekturasy onuň berkligini we ulanylandaky çykdajylaryny kesgitleýär.
