Gazagystanda Skidmore, Owings & Merrill (SOM) binagärlik kompaniýasy tarapyndan taslanan Alatau Iconic Complex and Gateway District taslamasy gurluşygyň başlangyç tapgyryna girdi.
Bu toplum häzirki wagtda gurluşygy dowam edýän hem-de ýurduň ykdysady we administratiw merkezi bolmaly Alatau şäherinde ýerleşer. Taslama dünýäde iň beýik binany we ABŞ-da iň beýik gökdirän binany guranlygy bilen meşhur bolan SOM firmasy tarapyndan işlenip düzüldi.
Bu etrabyň binagärlik merkezi Zailiý Alatausynyň jülgelerinden we buzluklaryndan ylham alan iki sany asimmetrik pahnapisint diň bolar. Esasy diňiň beýikligi 272 metr bolar hem-de onda ofisler we ýaşaýyş rezidensiýalary bolar. Gurluşygy tamamlanandan soň, ol Almaty sebitinde we Günorta Gazagystanyň iň beýik binasy bolar. 80 metr beýiklikdäki ikinji diň myhmanhanany we apartamentleri ýerleşdirmek üçin niýetlenendir.
Taslama sebitiň ýokary seýsmiki işjeňligini göz öňünde tutýar. Inženerler iki dizaýn görnüşini: Ýaponiýada ulanylýan titremäni basyjy ulgamy ýa-da amerikan modeline esaslanýan aşa berk polat çarçuwany göz öňünde tutýarlar.
Binalarda energiýany ýokary derejede tygşytlaýan fasadlar we günüň gyzgynlygyny peseltmek üçin kölege ulgamlary bolar. Içki atriumlar tebigy ýagtylygy we dag peýzažynyň panoramik görnüşlerini üpjün eder.
Diňleriň düýbünde üç gatly stilobat, bag-bakja, dükanlar, medeni meýdançalar we çäre geçirilýän ýerler meýilleşdirilen.
Gurluşyk meýdançasynda taýýarlyk işleri eýýäm başlandy, esasy ýer işlerine maý aýynda başlamak meýilleşdirilýär. Gurluşygyň 2029-njy ýylyň ahyryna çenli tamamlanmagyna garaşylýar.
