Türkiýäniň Ortaýer deňziniň kenaryndaky gadymy Siedra şäherinde arheologlar takmynan 1500 ýyllyk, gowy saklanan we gadymy grek dilinde degişmeli ýazgylar ýazylan mozaikany tapdylar. Onuň ýüzünde «Göribiň gözi çyksyn!!» diýen ýazgynyň bolmagy okanlarda geň galmak duýgusyny döretdi.
Alanýa uniwersitetiniň dosenti Ertug Ergüreriň ýolbaşçylygyndaky gazuw-agtaryş işlerinde tapylan bu 15 inedördül metr meýdanly mozaika gadym wagtlar bir baý adamyň ýaşan jaýynyň gapysyny bezän bolmaga çemeli. Sebäbi onuň dik merkezinde sahylygy hem myhmanparazlygy aňladýan «Şady-horramlykda ulanyň!» diýen hoşniýetli jümläniň, günorta böleginde bolsa uşak-düşek betniýet kişilere gönükdirilen «Göribiň gözi çyksyn!» diýen ýazgynyň bolmagy, şeýle pikir etmäge esas berýär.
Alymlaryň düşündirmegine görä, antik döwrüň ahyrlarynda işikden beýle ýazgylary asmak adat bolupdyr. Olar bir tarapdan, öý eýesiniň myhmanparazlygyny görkezse, ikinji tarapdan, öýi göz-dilden, kakyn-silkinden goramak üçin özboluşly doga-tumar hyzmatyny ýerine ýetiripdir.
