2025-nji ýyda ABŞ-nyň sazçylyk pudagynyň umumy girdejisi rekord derejä –11,5 milliard dollara ýetdi. Bu barada Variety neşiri Amerikanyň ses ýazgysy kompaniýalar birleşigine salgylanyp habar berýär.
Tölegli striming abunalaryndan gelýän girdejiler 6,8% ösüp, 5,88 milliard dollara ýetdi. Strimingiň umumy düşewündi bolsa 9,5 milliarda dollara deň boldy. Bu görkeziji tutuş pudagyň girdejisiniň takmynan 82%-ini düzýär. Tölegli hasaplaryň sany hem 106,5 milliona çenli köpeldi. Olar senagata 6,4 milliard dollar girdeji getirdi.
Winil plastinkalarynyň söwdasy eýýäm 19 ýyl bäri yzygiderli ösmegini dowam etdirýär. 1983-nji ýyldan bäri ilkinji gezek olardan gelýän girdeji 1 milliard dollardan aşdy. 2025-nji ýylda 1,04 milliard dollar gymmatynda, geçen ýyldakydan 7,9% köp – 46,8 million plastinka satyldy.
Bu görkezijilere uly goşant goşan Teýlor Swiftdir. Onuň «Life of a Showgirl» albomynyň 1,6 million töweregi winil nusgasy satyldy. Şeýle hem liderleriň arasynda Sabrina Karpenter hem bar. Onuň «Man’s Best Friend» we «Short n’ Sweet» plastinkalary 600 müň sapar satyn alyndy.
ABŞ tölegli striming abunalary boýunça dünýäniň iň uly bazary bolmagynda galýar. Ýurt bu segmentiň dünýä bahasynyň tas üçden birini we winil söwdasynyň global girdejisiniň ýarysyndan gowragyny üpjün edýär. Sazçylyk senagaty ýurduň jemi içerki önümine 212 milliard dollar çemesi goşant goşýar we 2,5 milliondan gowrak iş ornuny goldaýar.
