2026-njy ýylyň 1-nji martyndaky ýagdaýa görä, Türkmenistanyň Hytaýa eksport eden tebigy gazynyň umumy möçberi 460 milliard kub metre golaý boldy. Bu sanlary Türkmenistanyň Halk Maslahatynyň Başlygy Gurbanguly Berdimuhamedow Hytaýyň «CGTN» teleýaýlymynyň alypbaryjysy He Ýanke beren interwýusynda mälim etdi.
Milli Lider ýangyç-energetika pudagynyň hyzmatdaşlygyň strategik ugry bolup durýandygyny belledi. 2009-njy ýylda ulanmaga berlen Türkmenistan – Hytaý gaz geçirijisi arkaly her ýyl 40 milliard kub metre golaý gaz iberilýär.
Häzirki wagtda taraplar iberilýän gazyň möçberini ýylda 65 milliard kub metre çenli artdyrmagyň üstünde işleýär.
«Men ýene-de bir örän möhüm wakany nygtamak isleýärin. Hytaýyň “CNPC” kompaniýasy Türkmenistanyň günorta-gündogaryndaky, dünýäde iň iri gaz ýataklarynyň biri bolan «Galkynyş» känini özleşdirmek boýunça halkara bäsleşigiň ýeňijisi boldy. Bu taslama tebigy gazyň her ýylda 10 milliard kub metrini goşmaça ibermäge niýetlenendir. Şeýlelikde, uzak möhletleýin bökdençsiz ulanmak üçin türkmen energiýa serişdelerini Hytaýa eksport etmegiň kuwwatly üpjünçilik ulgamlary bilelikde, yzygiderli we gyşarnyksyz ösdürilýär».
Gurbanguly Berdimuhamedow köp ýyllaryň dowamynda Türkmenistanyň gaz ýataklaryny özleşdirmäge gatnaşýan hytaýly hyzmatdaşlaryň ak ýürekli işleýändiklerini aýratyn belledi.
