Gadymy Müsüriň hatdatlarynyň papiruslardaky ýalňyşlary häzirki zaman kanselýariýa ştrihine meňzeş madda bilen düzedendikleri alymlar tarapyndan subut edildi. Bu barada Kembrijdäki Fiswilliam muzeýiniň hünärmenleri mälim edýärler.
Bu aýratynlyk «Gadymy Müsürde ýasaldy» atly sergä taýýarlyk görülýän wagtynda ýüze çykaryldy. Sergi şaý-sepleriň, keramika önümleriniň we heýkelleriň döredilmeginde ulanylan tehnologiýalara we hünär usullaryna bagyşlanýar.
Sergä goýmak üçin «Merhumlar kitabynyň» 3300 ýyllyk nusgasyny taýýarlamak bilen meşgullanýan guramaçy Helen Stradwik adaty bolmadyk täsin bir ýagdaýa üns berýär. Sahypalaryň birinde b.e. öňki XIII asyrda patyşa arhiwlerini dolandyryjy Ramos atly hatdat we onuň ýanynda şagal kelleli Upuaut hudaýy diýlip çaklanylýan jandaryň suraty çekilipdir.
Mesele içgin öwrenilende, şagalyň şekiliniň iki tarapynda hem galyň ak reňk gatlagynyň bardygy anyklandy. Barlaglar bu maddanyň kalsit we hantitden ybaratdygyny görkezdi. Ramosyň eşigindäki ak reňkiň diňe hantitden ýasalandygy, şagalyň daşyndaky gatlagyň bolsa ýörite suraty düzetmek üçin çalynandygy subut edildi.
Stradwigiň aýtmagyna görä, nakgaş bu usul bilen şekiliň gyralaryny üýtgedip, ony has inçeldipdir. Mikroskop astynda ak tegmili papirusyň reňkine sazlamak üçin ulanylan sary reňkiň yzlaryny hem görmek bolýar.
«Merhumlar kitaby» ýazylan bu papirus 1922-nji ýylda Sedmentdäki guburlaryň birinden tapylypdy. Ol biziň döwrümize ýeten şeýle mazmunly ýazgylaryň iň oňat saklanan nusgalarynyň biri hasaplanýar.
