Müsüriň Patyşalar jülgesinde barlagçylar takmynan iki müň ýyl ozal syýahatçylar tarapyndan galdyrylan gadymy diwar ýazgylaryny tapdylar. Hindi dillerindäki bu ýazgylary biziň eýýamymyzyň I–III asyrlaryna degişli diýip hasaplaýarlar.
Şol döwürde Müsür şalygy Rim imperiýasynyň golastyndady. Professor Ingo Ştrauhyň aýtmagyna görä, Patyşalar jülgesi eýýäm şol wagtlar hem syýahatçylar üçin meşhur ýere öwrülipdir. Bäri gelen "turistler" mazarlaryň diwarlaryna atlaryny ýazypdyrlar we käwagt özleri barada maglumat hem goşupdyrlar.
Sanskrit dilindäki ýazgylaryň biri Indranandin atly adama degişli. Ol özüni «Kşaharata patyşasynyň ilçisi» diýip atlandyrýar. Kşaharata nesilşalygy biziň eýýamymyzyň I asyrynda Hindistanyň bir bölegini dolandyrýardy. Çaky, Indranandi Rime barýan wagty Patyşalar jülgesine sowlan bolmaly.
"Graffitileriň" awtorlarynyň arasynda Çikaý Korran atly adam has-da ünsüňi çekýär. Bäş sany mazarda tapylan ýazgylaryň sekizini şol galdyran eken. Ol tamil dilinde: «Çikaý Korran şu ýere gelip gördi» diýip ýazypdyr.
Käbir ýazgylar faraon Ramzes IX-nyň mazarynyň girelgesinden takmynan 5–6 metr belentlikde ýerleşýär. Barlagçylar awtoryň ol ýere nädip elini ýetirendigine düşünip bilenoklar.
Çikaý Korranyň söwdagär, hakyna tutma esger ýa-da ýerli toparyň serdary bolandygy çak edilýär. Dilinden çen tutsaň, ol Hindistanyň günortasyndan gelip çykan bolmagynyň mümkindigi aýdylýar.
