Adatça öýjükleri zeperlenmelerden goramaga kömek edýän B2 witamini, şol bir wagtyň özünde rak öýjükleriniň hem janly galmagyna ýardam berip biler. Ýulius Maksimilian adyndaky Wýursburg uniwersitetiniň Rudolf Wirhow merkeziniň alymlarynyň gelen bu netijesine esas bolan barlag hakda Nature Cell Biology žurnalynda çap edildi.
B2 witamini ýa-da riboflawin bedene diňe iýmit arkaly düşýär. Onuň esasy çeşmeleri süýt önümleri, et, ýumurtga we gök önümlerdir. Ol öýjükleriň içinde energiýa çalşygyna we dokumalary okislenme zeperlenmelerinden goramaga gatnaşýan molekulalara öwrülýär.
Alymlar öýjügiň ölmeginiň aýratyn bir görnüşi bolan ferroptoz hadysasyny öwrendiler. Bu hadysa, haçan-da demir maddasy öýjük membranalaryndaky ýaglaryň okislenmesine sebäp bolanda başlanýar. Eger goranyş mehanizmleri işlemese, öýjük kem-kemden dargap ugraýar. Bu tebigy hadysa bedeniň zeperlenen öýjüklerden dynmagyna kömek edýär.
Emma, muňa garamazdan çiş öýjükleri özleriniň antioksidant goranyşyny güýçlendirmek arkaly ferroptozdan gutulmagy başarýarlar. Geçirilen barlaglar bu ýagdaýda B2 witamininiň madda çalşygynyň uly täsiriniň bardygyny görkezdi.
Munda esasy orun FSP1 belogyna degişlidir. Onuň işi riboflawinden emele gelýän molekulalara baglydyr. Alymlar öýjük modellerinde B2 witamininiň derejesini peseldenlerinde, rak öýjükleriniň okislenmä has durnuksyzdygy we çalt ölýändigi anyklandy.
Şeýle-de, gözlegçiler gurluşy boýunça B2 witaminine meňzeş bolan tebigy birleşme — rozoflawini-de seljerdiler. Tejribeler bu maddanyň hatda pes mukdarda hem rak öýjüklerinde ferroptoz hadysasyny başladyp bilýändigini görkezdi.
Alymlar indiki bu mehanizmi has takyk bökdäp biljek maddalary tapmagy we olary kliniki synaglara çenli bolan usullarda barlamagy meýilleşdirýärler.
