Blue Origin kompaniýasy NASA we ylmy guramalar bilen hyzmatdaşlykda Ýeri howply asteroidlerden goramak üçin ulgam işläp düzýär. Taslama NEO Hunter diýlip atlandyrylýar.
Ol dürli orbitalarda işläp bilýän we 4000 kg çenli enjamlary daşamaga ukyply modul hemra ulgamy bolan Blue Ring platformasyny ulanmaklyga esaslanýar.
Bu missiýa birnäçe tapgyrdan ybarat. Ilki bilen, apparat asteroide golaýlaşyp, onuň düzümini, massasyny we dykyzlygyny öwrenjek kiçi hemralary (kubsatlary) uçurar. Bu bolsa iň netijeli täsir ediş usulyny saýlamaga mümkinçilik berer.
Bir usul ion şöhlesini ulanmagy öz içine alýar. Ol zarýadly bölejikleriň akymyny gönükdirip, obýektiň orbitasyny kem-kemden üýtgeder. Eger bu ýeterlik bolmasa, kinetiki täsir ediji guraly ulanmak meýilleşdirilýär - apparat asteroide sagatda 36 370 km tizlik bilen gönükdiriler.
Çaknyşykdan öň, hemra çaknyşyk pursadyny ýazga almak üçin bölnüp aýrylar. Şeýle çemeleşme DART missiýasy mahalynda, 2022-nji ýylda kosmos gämisi Dimorfos asteroidi bilen çaknyşyp, has uly Didimos asteroidiniň töweregindäki orbitasyny üýtgedende görkezilipdi.
Kompaniýa taslamanyň ylmy wezipeler we planetalary goramak üçin täjirçilik kosmos tehnologiýalarynyň mümkinçiliklerini görkezýändigini belleýär.
