Mart-aprel aýlarynda Türkmenistanda Ýewropanyň täzeleniş we ösüş banky (ÝTÖB) bilen hyzmatdaşlygy giňeltmek boýunça meýilnamany taýýarlamak göz öňünde tutulýar. Bu meselä 20-nji martda sanly ulgam arkaly geçirilen Hökümet mejlisinde garaldy diýip, «Watan» habarlar gepleşiginde mälim edildi.
Wise-premýer, daşary işler ministri Raşid Meredow bank bilen alnyp barylýan özara gatnaşyklar barada hasabat berdi. Türkmenistanyň 1992-nji ýyldan bäri bu bankyň agzasydygy we şol döwürden bäri maliýe, söwda, önümçilik hem-de kiçi we orta telekeçiligi goldamak ulgamlarynda 80-den gowrak taslamanyň durmuşa geçirilendigi bellenildi.
Mejlisiň dowamynda hyzmatdaşlygy has-da berkitmek boýunça teklipler hödürlendi. Hususan-da, 2026–2030-njy ýyllar üçin hyzmatdaşlygyň täze strategiýasynyň ugurlaryny gutarnykly görnüşde taýýarlamak we maliýe-ykdysady edaralaryň wekilleriniň gatnaşmagynda iş toparyny döretmek göz öňünde tutulýar.
Şeýle hem ulag-logistika ulgamynda, şol sanda demir we awtomobil ýollaryny gurmak hem-de döwrebaplaşdyrmak taslamalary boýunça özara gatnaşyklary işjeňleşdirmek, şunlukda Ýewropa Bileleşiginiň «Global Gateway» strategiýasyny hasaba almak bilen gepleşikleri geçirmek teklip edilýär.
Prezident Serdar Berdimuhamedow hödürlenen teklipleri makullady we bu ugurdaky işleri dowam etdirmegi tabşyrdy.
