«Nepal häkimiýetleri Ewerest dagyna çykýan alpinistler üçin täze düzgün girizdiler. Oňa görä, indi olar ikinji binýatlyk lagerden (6 400–6 750 metr) ýokardaky künjeklere çykanlarynda, gaýdyşyn azyndan 2 kg zibil ýygnap getirmeli bolarlar» diýip, The Himalayan Times gazeti habar berdi.
Aslynda-da ekspedisiýanyň agzalary ýöriş tamamlanandan soň binýatlyk lagere 8 kg galyndy tabşyrmaly edilipdi. Indi bolsa muňa iň belent nokada ýakyn ýerlerden zibil ýygnamak borjy hem goşuldy. Talaplaryň ýerine ýetirilişine Sagarmatha hapalanma gözegçilik komitetiniň işgärleri gözegçilik ederler.
Komitetiň baş direktory Tsering Şerpa şu möwsümden başlap, alpinistlere öz şahsy galyndylary salnan paketlerini ulanmagyň hem gadagan edilendigini duýdurdy. Mundan beýläk olar öz hajatlary üçin komitet we ýerli häkimiýetler tarapyndan berilýän ýörite gaplary ulanmaly bolarlar.
«Hökmany ulanylmaly bu zibil haltalar hasaba alnar we alpinistler ýörişden dolanyp gelenlerinde yzyna ýygnalar» diýip, Tsering Şerpa täze düzgüniň käbir aýratynlyklaryny düşündirýär.
Onuň aýtmagyna görä, bu çäräniň maksady dagyň üstünde hapa galyndylaryň bolmazlygyny gazanmakdyr.
