Dürli yklymlarda täze megataslamalaryň gurluşygy dowam edýär. Bu desgalar beýikligi, gerimi we tehnologiki çözgütleri boýunça dünýä rekordyny goýup bilerler.
Jeddah Tower, Saud Arabystany
Jeddah Tower diňi garaşylyşyna görä, takmynan, 2028-nji ýylda gurlup gutarylandan soň, dünýäde iň beýik gökdirän bolup biler. Onuň çaklanylýan beýikligi takmynan 1000 metr bolup, Burj Halifanyňkydan 170 metrden gowrak beýikdir. Ol bir kilometrlik çäkden geçen ilkinji bina bolar.
Bu gökdirän "dik şäher" hökmünde göz öňüne getirilýär. Onuň 200-den gowrak gatynyň içinde ofisler, ýaşaýyş apartamentleri we bäş ýyldyzly myhmanhana ýerleşer. Taslama güýçli ýelleriň agramyny göterer ýaly we ýokary belentliklerde liftleriň işleýiş aýratynlyklary sebäpli çylşyrymly inženerlik çözgütleri talap edýär.
"Mukaab", Er-Riýad, Saud Arabystany
“Mukaab” dünýäde göwrümi boýunça iň uly bina bolar. Kub görnüşli desga, takmynan, 1,4 million inedördül metr meýdany tutar we bir üçegiň astyndaky tutuş şäher mähellesini emele getirmeli.
Bina Er-Riýadyň New Murabba etrabynyň merkezinde gurulýar. Gurluşygy 2030-njy ýylda, şäherde Expo Er-Riýad sergisiniň geçiriljek wagtyna gabatlap tamamlamak meýilleşdirilýär. Bu desganyň gerimi hatda Boeing Everett Factory zawodyndan hem geçer.
Burj Binghatti, Dubaý, BAE
Burj Binghatti gökdirän binasy dünýäde iň beýik ýaşaýyş jaýyna öwrülip biler. Onuň beýikliginiň takmynan 557 metre ýetmegine we Nýu-Ýork şäherindäki Central Park Tower-den hem ýokary bolmagyna garaşylýar.
Häzir gurluşyk işleri dowam edýär we ony 2026-njy ýylyň ahyryna çenli tamamlamak meýilleşdirilýär. Süýnmek şekilli we bezeg täji bolan binanyň gurluşy onuň uly beýiklikde yraň atmazlygy üçin çylşyrymly çözgütleri talap edýär.
Atlassian Central, Awstraliýa
Atlassian Central-yň dünýäde iň beýik gibrid agaç diň bolmagyna garaşylýar. Gurluşykda gabaraly agaç, polat we beton ulanylýar, bu bolsa binanyň uglerod yzyny azaldýar.
Binanyň eýýäm ýarysy gurlup gutardy. Açylyşy 2026-njy ýylyň ahyryna meýilleşdirilýär. Taslama ekologiýa taýdan arassa beýik jaýlaryň gurluşygy üçin nusga hasaplanýar.
Sagrada Familiýa, Barselona, Ispaniýa
Sagrada Familiýa ybadathanasynyň gurluşygy bir asyrdan gowrak wagt bäri dowam edýär we tamamlanyp barýar. Merkezi diň gurlup gutarylandan soň, ybadathananyň beýikligi, takmynan, 172,5 metr beýiklige ýetdi, bu ony dünýäde iň beýik ybadathana öwürdi.
Esasy gurluşyk işleri 2026-njy ýylda - binagär Antoni Gaudiniň aradan çykmagynyň ýüz ýyllygyna gabatlanyp tamamlandy. Şeýle-de bolsa, binanyň bezeg işleri bu seneden soň hem dowam edýär.
