Warner Bros. studiýasy Deni Wilnýowyň režissýorlyk eden “Alaň: üçünji bölüm” filminiň tizer treýlerini çykardy. 2 minut 29 sekuntlyk treýleriň ilkinji görkezilişi Los-Anjelesdäki AMC kinoteatrynda geçirildi.
Treýleriň görkezilişine Deni Wilnýow, Zendeýa, Hawýer Bardem we taslama goşulan täze aktýorlar Anýa Teýlor-Joý bilen Robert Pattinson dagy gatnaşdy. Timoti Şalame çärä gatnaşmady, ýöne "Wilnýowy geniý hasaplaýandygyny" ýetirmegi sargady.
Täze film Frenk Gerbertiň "Alaň halasgäri" romanyna esaslanyp, “Alaň” romanyndaky hekaýaty dowam etdirýär. Wakalar ikinji filmdäkilerden takmynan 15 ýyl soň ýaýbaňlanýar. Pol Atreýdes (Şalame) bu geçen wagtyň dowamynda hökümdar bolan. Ol syýasy sebäplere görä Çaniden (Zendaya) aýrylyp, şa gyzy Irulan (Florens Pýu) bilen durmuş gurýar. Indi onuň töwereginde dildüwşük başlanýar.
Režissýor öň üçünji filmde wakalaryň jemlenjekdigini aýdypdy. Şeýle hem ol aslynda ara köpräk wagt salyp, Şalameniň ulalmagyna garaşmagy göz öňünde tutandygyny, ýöne bu pikirinden dänip, filmi düşürip gutarmak kararyna gelendigini gürrüň berdi.
Filmiň ilkinji görkezilişi 2026-njy ýylyň 18-nji dekabryna meýilleşdirilýär.
