Fransiýa mundan 110 ýyl ozal Kot-d’Iwuardan alnyp gidilen rowaýaty «Jiji Aýokwe» atly «gepleýän depregi» yzyna gowşurdy. Bu barada The Guardian neşiri habar berýär.
Uzynlygy 4 metr, agramy 430 kilogram bolan bu äpet saz guraly adamyň gepleýiş sesini gaýtalamaga ukyplydyr. Geçmişde ony daş aralyklara habar ýetirmek üçin ulanypdyrlar.
Baknalyk häkimiýetine garşylygyň nyşanyna öwrülen deprek ebriýe halky üçin örän möhüm simwoliki ähmiýete eýedir. Fransiýanyň baknalyk häkimiýetleri 1916-njy ýylda ýerli ýaşaýjylaryň ýol gurluşygyndaky mejbury işlerden boýun gaçyrmaklary sebäpli, temmi hökmünde depregi alyp gidipdiler.
Täsin taryhy gymmatlyk Fransiýanyň prezidenti Emmanuel Makronyň 2021-nji ýylda beren wadasyndan soň yzyna gaýtaryldy. Medeni mirasyny yzyna almak baradaky gepleşikler dört ýyl dowam etdi.
Kot-d’Iwuaryň medeniýet ministri Fransuaza Remark depregiň gaýtarylmagyny «Adalaty we hormaty galkyndyran taryhy pursat» diýip atlandyrdy.
Deprek Abidžan şäheriniň aeroportynda dabaraly ýagdaýda garşylandy. Geljekde ol Kot-d’Iwuaryň Ösüşler muzeýinde hemişelik ýerleşdiriler. ÝUNESKO eýýäm bu sergini taýýarlamak üçin 100 müň dollar serişde geçirdi.
