1970-nji ýyllarda älem giňişligine uçurylan «Woýajer-1» we «Woýajer-2» planetara stansiýalary 40 ýyldan gowrak wagt bäri Gün ulgamyndan daşlaşyp gelýärler. «Woýajer-1» 2012-nji ýylda, «Woýajer-2» bolsa 2018-nji ýylda ýyldyzara giňişlige çykdy. Iki apparat hem göni traýektoriýa boýunça hereket edip, Ýerden we Günden kem-kemden daşlaşmagyny dowam etdirýärler.
Emma astronomlar ýylyň dowamynda birnäçe aýlap zondlar bilen Ýeriň arasyndaky uzaklygyň wagtlaýynça azalýandygyny belleýärler. Bu ýagdaý apparatlaryň ugruny üýtgetmegi bilen bagly däldir.
Munuň sebäbi Ýeriň Günüň töwereginde aýlanmagy bilen düşündirilýär. Biziň planetamyz sekuntda takmynan 30 km tizlik bilen hereket edýär — bu tizlik zondlaryň daşlaşma tizliginden has ýokarydyr: «Woýajer-1» sekuntda takmynan 17 km, «Woýajer-2» bolsa takmynan 16 km tizlik bilen daşlaşýar.
Ýylyň belli bir döwründe Ýer apparatlara bölekleýin «ýetýär», şonuň üçin hem olaryň arasyndaky aralyk wagtlaýynça gysgalýar. Mysal üçin, 2026-njy ýylyň 9-njy fewralynda «Woýajer-2» Ýerden 143,09 astronomik birlik (a.b.) uzaklykda ýerleşipdir. Iýun aýynyň başyna çenli bu görkeziji takmynan 143,4 a.b. çenli azalar (iň pes nokadyna ýeter), şondan soň bolsa täzeden artyp başlar.
Şeýlelikde, bu wagtlaýyn ýakynlaşma asman mehanikasynyň kanunlary we Ýeriň öz orbitasyndaky hereketi bilen düşündirilýär. Apparatlaryň özi bolsa Gün ulgamyndan hemişelik daşlaşmagyny dowam etdirýärler.
