Maýkl B. Jordon režissýor Raýan Kugleriň «Günäliler» (Грешники) filmindäki keşbi üçin «Iň gowy erkek keşbi» kategoriýasynda «Oskar» baýragyna mynasyp boldy. Ýeňiji Amerikan kino sungaty we ylymlar akademiýasynyň baýragynyň 98-nji gowşurylyş dabarasynda yglan edildi. Çäre 16-njy martda ir säher bilen (Aşgabat wagty boýunça) Los-Anjelesde geçirildi.
Aktýor bu baýraga ilkinji gezek dalaşgar görkezildi. Ol bu ugurda Leonardo Di Kaprio («Bir söweşden soň beýleki»), Timoti Şalame («Marti Beýik»), Itan Houk («Mawy aý») we Wagner Moura («Gizlin agent») ýaly ussat kärdeşlerinden üstün çykdy.
«Günäliler» — bu «Krid» we «Gara babyr» filmleriniň awtory Raýan Kugleriň horror filmidir. Bu film şu ýyl «Oskar» baýragynyň 16 nominasiýasynda hödürlenip, bir doly metražly film üçin dalaşgärlikleriň sany boýunça rekord goýdy.
Filmiň wakalary 1932-nji ýylda ABŞ-nyň Missisipi ştatynda bolup geçýär. Uruşdan dolanyp gelen ekiz doganlar bar açmagy we zehinli sazanda mümkinçilik bermegi ýüregine düwýär. Emma syrly bir wampiriň peýda bolmagy olaryň meýilnamalaryny bozýar. Maýkl B. Jordon bu filmde birbada iki keşbi — doganlar Smok we Stegiň (Kül we Tüsse) keşplerini ýerine ýetirdi.
«Iň gowy ikinji derejeli erkek keşbi» ugrundaky «Oskar» baýragyny bolsa «Bir söweşden soň beýleki» (Битва за битвой) filmindäki keşbi üçin Şon Penn aldy. Aktýoryň özi dabara gatnaşmady.
Bu baýrak Şon Penniň karýerasynda üçünji «Oskary» boldy. Mundan ozal ol «Syrly derýa» (2004) we «Harwi Milk» (2009) filmlerinde iň gowy erkek keşbi üçin baýrak alypdy. Indi ol Deniel Deý-Lýuis, Jek Nikolson we Wolter Brennan ýaly Amerikan kinoakademiýasynyň üç baýragyny alan az sanly aktýorlaryň hataryna girdi.
