Täze BMW iX3 elektrokrossowerine bolan ýokary isleg BMW kompaniýasyny önümçilik meýilnamalaryna üýtgeşme girizmäge mejbur etdi. «BMW Blog» neşiriniň berýän maglumatyna görä, konserniň ýolbaşçylygy Wengriýanyň Debresen şäherindäki zawodynda möhletinden öň ikinji iş çalşygyny girizdi.
Kompaniýanyň wezipesinden gidýän baş direktory Oliwer Sipse, geçen ýylyň sentýabr aýynda model tanyşdyrylan gününden bäri, brendiň Ýewropadaky ähli elektrik awtoulag sargytlarynyň takmynan üçden bir böleginiň hut şu iX3-üň paýyna düşýändigini mälim etdi. Alyjylaryň nobaty eýýäm takmynan bir ýyl öňünden doldy. Kärhana doly kuwwatyna eýe bolandan soň, zawodda ýylda 150 müňe çenli awtoulag öndürip biler.
Häzirki wagtda Wengriýadaky kärhana diňe standart teker binýatly (NA5) iX3 wersiýasyny öndürýär. Geljekde önümçilik has-da giňeler. Uzaldylan binýatly (NA6) wersiýany Aziýa bazarlary üçin Hytaýda ýygnamak meýilleşdirilýär, 2027-nji ýylda bolsa önümçilik Meksikadaky zawodda hem ýola goýlar.
Häzirki wagtda alyjylar üçin diňe bir wersiýa — 50 xDrive elýeterlidir. Ýylyň ahyryna çenli kompaniýa has amatly bahaly 40 we 40 xDrive modifikasiýalaryny hödürlemegi meýilleşdirýär. Şeýle-de, has güýçli iX3 M60 wersiýasy taýýarlanylýar, 2027-nji ýylda bolsa has hem ýokary öndürijilikli X3 M modeliniň çykmagyna garaşylýar.
Mundan başga-da, 18-nji martda BMW Neue Klasse platformasynda täze elektrikli i3 sedanyny tanyşdyrmagy meýilleşdirýär. Onuň önümçiligi ýylyň ikinji ýarymynda kompaniýanyň Mýunhendäki zawodynda başlar. Munuň üçin benzinli we dizelli 3-nji seriýaly sedanlaryň önümçiligi Dingolfingdäki kärhana geçiriler.
