2026-njy ýylda BMW Group-yň düzümine giren Alpina kompaniýasy ösüşiň täze tapgyrynda brendiň ilkinji awtoulagy bolan Vision BMW Alpina konseptini tanyşdyrdy.
Täze ulag uly göwrümli kaşaň kupe formatynda döredildi. Kompaniýa bu konseptiň «dinamikanyň we rahatlygyň sazlaşmagynda üýtgeşik mümkinçilikleri, nepisligi hem-de ýokary ussatlygy» utgaşdyrýandygyny mälim etdi. Modeliň köpçülikleýin öndüriljek görnüşiniň geljek ýylda tanyşdyrylmagyna we onuň BMW 7 Series modelinden ylham alyp döredilmegine garaşylýar.
Awtoulagyň uzynlygy 5,2 metre barabar bolup, ol häzirki bar bolan 5 Series we 7 Series modelleriniň aralygynda durýar. Ulagyň kapotynyň aşagynda V8 hereketlendirijisi gurnalan hem bolsa, onuň häsiýetnamalary häzirki wagtda mälim edilmeýär. Öndüriji bu ulagyň Alpina brendine mahsus bolan özboluşly sesini saklap galjakdygyny habar berdi.
Konsept inçe yşyklandyryş ulgamyna, BMW-niň yşyklandyrylan uly radiator gözenegine we öňe çykyp duran özüne çekiji «akula burnuna» eýe boldy. Awtoulag 20 keýeli tigirler bilen üpjün edildi: öň tarapda 22 dýuýmlyk diskler, yz tarapda bolsa 23 dýuýmlyk diskler gurnalan. Ulagyň yzky böleginde gaz çykaryş ulgamynyň dört sany süýrümtik şekilli turbajygy we inçe faralary ýerleşdirildi.
Ulagyň salonynda BMW-niň Panoramic iDrive ulgamly täze dizaýny, ýolagçy üçin aýratyn ekran we az sanly fiziki düwmeler ulanyldy. BMW Group Design-yň ýolbaşçysy Adrian wan Hoýdonk kompaniýanyň Alpina brendini elmydama tapawutlandyrýan tizlik we rahatlyk deňagramlylygyny saklap galmaga çalyşýandygyny mälim etdi.
