Günorta Koreýa dünýäniň iň ösen ykdysadyýetli döwletleriniň biri hasaplanylýar. Ýurt özüniň ýokary tehnologiýaly senagaty, dünýä belli brendleri we ýokary ýaşaýyş derejesi bilen tanalýar. Emma muňa garamazdan, respublikanyň ilatynyň sany güýçli depginde azalýar.
2020-nji ýyldan bäri ýurtda aradan çykýanlaryň sany dogulýanlaryň sanyndan artyk gelýär. Häzirki wagtda ýaşaýjylaryň takmynan 21%-i 65 ýaşdan uly adamlardyr. Hut şonuň üçin hem koreý jemgyýeti «aşa garry» kategoriýasyna degişli edilýär. Dogulýanlaryň sanynyň pes bolmagynyň esasy sebäpleri hökmünde jaýlaryň gymmatlygy, çaga ulaltmak üçin çykdajylaryň köplügi we ýaşlaryň agramly böleginiň diňe karýera üns bermek islegi görkezilýär.
Günorta Koreýanyň «deňiz paýtagty» hasaplanýan Pusan şäheri bu demografik pese gaçyşyň nyşanyna öwrüldi. Bu ýerde her aýala düşýän çagalaryň sany 0,5-den çala köpdür. Şäheriň merkezi köçelerinde gezelenç edeniňde, hamyla aýallara ýa-da kiçi çagaly maşgalalara duş gelmek örän seýrek hadysa.
Ýagdaýy düzetmek üçin ýerli häkimiýetler uly maliýe goldawly maksatnamany ýola goýdular. Şunlukda şäher häkimligi ýaşlaryň tanyşmak üçin duşuşyk çykdajylaryny, gudaçylyk dabaralaryny we toýdan soňky syýahatlaryny töleýär. Olar ýaş çatynjalara nika baglaşmak we toý sowmak üçin 50 million won (takmynan 33,2 müň dollar), çaga dogulmagy üçin 300 million won (tas 200 müň dollar) möçberinde pul töleýärler. Mundan başga-da, ýaş maşgalalar üçin 90%-e çenli ýeňillikli ipoteka hyzmaty hereket edýär.
Demograflaryň maglumatlaryna görä, hatda şeýle bähbitli çäreler hem maşgala gurýanlaryň sanynyň görnetin artmagyny gazanyp bilmedi. Eger ýagdaý öňküligine dowam etse, Günorta Koreýanyň ilaty ýakyn ýyllarda örän azalyp başlap biler.
