2026-njy ýylyň 10-njy — 25-nji apreli aralygynda M.W.Lomonosow adyndaky Moskwa döwlet uniwersiteti tarapyndan guralýan «Lomonosow» XXXIII talyplaryň, aspirantlaryň we ýaş alymlaryň halkara ylmy maslahaty geçiriler.
Ylym we bilim babatda halkara hyzmatdaşlygy ösdürmegiň çäklerinde bu gezekki forumyň halkara meýdançalarynyň Aşgabat şäherinde, Döwletmämmet Azady adyndaky Türkmen milli dünýä dilleri institutynyň hem-de Magtymguly adyndaky Türkmen döwlet uniwersitetiniň binýadynda guralmagy meýilleşdirilýär. Bu barada TMDDI-niň saýtynda habar berilýär.
Bu ýyl maslahatyň halkara meýdançasy has-da giňeldilip, ylmyň dört ugry boýunça işler alnyp barlar. Döwletmämmet Azady adyndaky Türkmen milli dünýä dilleri instituty «Daşary ýurt dilleri we sebiti öwreniş», «Terjimäniň nazaryýeti, taryhy we usulyýeti» hem-de «Filologiýa» ugurlary boýunça jogapkär gurama hökmünde çykyş edýär, Magtymguly adyndaky Türkmen döwlet uniwersiteti bolsa «Himiýa» ugry boýunça işleri utgaşdyrýar. Forumyň işine gatnaşmaga 35 ýaşa çenli ýaşdaky talyplar, magistrantlar, aspirantlar we ýaş alymlar çagyrylýar. Olar 2026-njy ýylyň 6-njy apreline çenli «Lomonosow» ylym-bilim portalynda hasaba alnyp biler.
Rus we iňlis dillerinde geçiriljek bu ylmy maslahata gatnaşmak tölegsiz bolup, onuň netijeleri boýunça gatnaşyjylar sertifikatlar, iň oňat ylmy işleriň awtorlary bolsa ýörite diplomlar bilen sylaglanar.
«Garaşsyz, baky Bitarap Türkmenistan – bedew batly at-myradyň mekany» diýlip yglan edilen 2026-njy ýylda geçirilýän bu çäre türkmen ýokary okuw mekdepleriniň dünýäniň abraýly ylym merkezleri bilen hyzmatdaşlygynyň asylly däbine öwrüler.
