Porsche kompaniýasy çykdajylary azaltmak üçin Taycan we Panamera modellerini birleşdirip biler. Metbugat habarlaryna görä, Panamera ady galyp, Taycan-yň bolsa awtoulaglaryň hataryndan çykarylmagy mümkin.
Porsche kompaniýasynyň ilkinji elektrik awtoulagy Taycan žurnalistlere 2019-njy ýylyň sentýabr aýynda görkezildi. Synag sürüşi Berlinde geçirildi. Modeliň ady türk dilinden gelip çykýar we “ýyndam taýçanak” diýmegi aňladýar. Synaga gatnaşanlar ýoluň Germaniýanyň paýtagtyndan başlanmagynyň simwoliki manysynyň bardygyny bellediler: dürli çaklamalara görä, şäheriň takmynan 250 müň ýaşaýjysynyň asly türkdir.
Synag sürüş ýoly çalt zarýad beriji beketleriň arasyndan geçirýärdi. Guramaçylar awtoulagyň batareýasynyň çökmegi we ewakuator çagyrmak töwekgelçilikleriniň öňüni almak üçin sürüjilere bu ýoldan çykmazlygy maslahat berdiler.
Daşky görnüşi boýunça Taycan Germaniýanyň ýollarynda köp wagt bäri yzygiderli ulanylýan Panamera sedany bilen meňzeş diýen ýalydy. Şeýle çemeleşme ýöriteläp edildi: kompaniýa ulag alyjylara içinden otlanýan hereketlendirijili tanyş model ýaly görünse, elektrik ulagyna geçmegiň has aňsat boljakdygyna umyt baglaýardy.
Şeýle-de bolsa, bazardaky ýagdaý üýtgedi. Bäsdeşligiň artmagy we elektrik awtoulaglaryna bolan gyzyklanmanyň azalmagy satuwyň pese düşmegine getirdi. Bu, esasanam, Porsche-niň esasy bazarlarynyň biri bolan Hytaýda has aýdyň görünýär.
Eger 2023-nji ýylda ýurtda 40 müňden gowrak Taycan satylan bolsa, 2024-nji ýylda takmynan iki esse az, geçen ýyl bolsa takmynan 16 müň elektrik sedany satyldy.
