2026-njy ýylyň 1-nji aprelinde Apple kompaniýasynyň döredilenine 50 ýyl dolýar we kompaniýa bu sene mynasybetli birnäçe çäreleri hem-de uly tanyşdyryşlary taýýarlaýar. Apple-iň baş direktory Tim Kuk bu möhüm senäniň gelerine garaşyp durman, kompaniýanyň saýtynda Apple-iň enjamlaryndan we hyzmatlaryndan peýdalanýanlaryň ählisine gönükdirilen açyk haty çap etdi.
Hat «50 ýyl bäri başgaça pikir edýäris» (50 years of thinking different) diýlip atlandyrylýar. Bu sözler Apple-iň meşhur «Think Different» mahabat şygaryna yşarat edýär. Tim Kuk brendiň şu wagta çenli bu ýörelgä eýerendigini we geljekde-de ondan ýüz öwürmejekdigini belledi.
«Elli ýyl mundan ozal kiçijik bir garažda uly ideýa dünýä indi. Apple hemişe ýönekeý bir pikire esaslanýardy: tehnologiýalar şahsy bolmalydyr. Şol wagtlar düýbünden başgaça diýlip hasaplanan bu ynanç hem ähli zady üýtgetdi.
1-nji aprelde Apple-e 50 ýyl dolýar. Birinji Apple kompýuterinden Mac-a çenli, iPod-dan iPhone-a, iPad-dan Apple Watch we AirPods-a çenli, şeýle hem her gün ulanýan App Store, Apple Music, Apple Pay, iCloud we Apple TV ýaly hyzmatlarymyz bilen biz eýýäm bäş onýyllygyň dowamynda mümkinçilikleriň çägi baradaky düşünjäni üýtgedýäris we adamlaryň eline güýçli gural berýäris. Her bir öňegidişlikde bize bir pikir itergi berdi — dünýä başgaça pikir edýän adamlaryň saýasynda öňe barýar».
Tim Kuk öz hatynda her bir oýlap tapyşy taryhyň diňe bir başlangyjy diýip atlandyryp, esasy baplary işlemek, okamak, arzuw etmek we täze açyşlar üçin kompaniýanyň tehnologiýalaryny ulanyjylaryň özüniň ýazýandygyny nygtady.
«Siziň eliňizde biziň döreden gurallarymyz adamlaryň durmuşyny gowulandyrdy, käwagt bolsa hatda halas etdi. Bize ylham berýän zat hem şudur — tehnologiýanyň diňe özüniň näme edip bilýändigi däl-de, eýsem siziň şol tehnologiýanyň kömegi bilen amala aşyryp biljek zatlaryňyzdyr».
Kuk kompaniýanyň häzire çenli ýoluny bile geçen millionlarça müşderilere we işläp düzüjilere minnetdarlyk bildirdi: «Siziň pikirleriňiz biziň işimize ylham berýär. Siziň ynamyňyz bolsa bizi has-da kämilleşdirýär. Siziň wakalaryňyz bize başgaça pikir edeniňde nähili üstünliklere ýetip boljakdygyny ýatladýar».
Apple-iň baş direktory öz hatyny dünýäni başgaça görýän we ony gowulyga tarap üýtgetmäge özünde batyrgaýlyk tapýanlary goldamak bilen tamamlady.
