Apple Music hyzmaty emeli aň arkaly döredilen kontente bellik goýmaga başlar. Bu barada NME neşiri habar berýär.
Täze düzgünlere görä, distribýutorlar saz, tekst, klip ýa-da obložka döredilende emeli aňyň ulanylandygyny ýa-da ulanylmandygyny görkezmeli bolarlar.
Music Business Worldwide neşiriniň ýazmagyna görä, bu bellik häzirki wagtda leýbliň islegi boýunça elde goýulýar, ýöne geljekde bu hökmany düzgüne öwrüler. Apple bu täzeligi “bütin pudak üçin adalatly düzgünleri işläp düzmekde zerur bolan açyklyga tarap ilkinji ädim” diýip atlandyrýar.
Bu karar emeli aň tarapyndan döredilen kontentiň çalt ösüşi bilen baglanyşyklydyr. Geçen ýyl geçirilen barlag diňleýjileriň 97% -iniň adamlar tarapyndan döredilen saz bilen emeli aň tarapyndan döredilen eserleri tapawutlandyryp bilmeýändigi görkezdi.
Ozal bilermenler aýdym-saz bilen meşgullanýanlaryň emeli aňyň ýaýramagy sebäpli indiki dört ýylyň dowamynda girdejileriniň dörtden bir bölegine çenli ýitirmek howpunyň bardygyny duýdurypdylar.
Şol bir wagtyň özünde, emeli aň arkaly döredilen şeýle kontente garşy göreşi geçen ýyl Spotify hem yglan edipdi we 75 million “spam treki” platformadan aýyrdy. Şol wagtlar EA tarapyndan döredilen aýdymlaryň aradan çykan sazandalaryň sosial media hasaplaryna birugsat ýüklenendigi habar berildi.
