Beýik Britaniýadaky Kent graflygynyň Hedkorn obasynyň ýaşaýjysy 70 ýaşly Kollin Fergýuson özüniň Inka atly nemes owçarkasynyň öýken ragyny wagtynda anyklamaga kömek edendigini aýdýar.
Daily Star neşiriniň ýazmagyna görä, zenanyň iti özüni adatdakydan üýtgeşik alyp baryp, esasanam eýesiniň dem alşyna aýratyn üns beripdir.
Fergýusonyň gürrüň berşi ýaly, şol wagtlar iki ýaşyndaky owçarka birnäçe hepdeläp, yzly-yzyna eýesiniň ýüzüne golaý durmaga we onuň demindäki howany ysgamaga çalşypdyr. Bu ýagdaýa biynjalyk bolan eýesi dişlerini barlatmak we umumy barlagdan geçmek üçin lukmana ýüz tutupdyr. Geçirilen barlaglaryň netijeleri saglyk ýagdaýynyň kadalydygyny görkezipdir.
Itiniň barybir geňsi hereketlerini dowam etmegi zerarly Fergýuson birnäçe aýdan soň organizmini doly barlatmak kararyna gelýär. Tiz wagtdan lukman onuň çep öýkeninde golf pökgüsiniň ululygynda çişiň bardygyny habar berýär. Soňra diagnoz takyklanýar we ol birinji tapgyrdaky rak keseliniň alamaty bolup çykýar.
70 ýaşly zenan aram-aram agyr ýadawlykdan başga ynjalyksyzlyk duýmandygyny, ony bolsa öz ýaşy hem-de mugallymçylyk işi bilen baglanyşdyrandygyny gürrüň berýär. Şeýlelikde 2015-nji ýylyň tomsunda Fergýusonyň çişini aýyrmak üçin operasiýa geçirýärler. Şowly amala aşan operasiýadan soňra goşmaça bejergi almak hem gerek bolmaýar.
Zenan hirurgyň şol wagtlarky özüne: «Bu keseli birinji tapgyrda anyklamak bize-de başardanok. Siziň janyňyzy itiňiz halas etdi» diýen sözlerini ýatlaýar.
Kollin Fergýusonyň wepaly iti häzir 13 ýaşynda. It eýesiniň duýdansyz dörän saglyk meselelerinden soňky başyndan geçiren gorky we ynjalyksyz ýagdaýlarynda kömek etmek üçin ýörite tälim hem aldy.
