Hytaýyň Kommersiýa ministrligi Niderlandlarda ýerleşýän Nexperia kompaniýasynyň baş edarasy tarapyndan edilýän hereketleriň gepleşikler üçin täze päsgelçilikleri döredýändigini mälim etdi. Mundan ozal, kompaniýa Hytaýdaky işgärleriniň korporatiw hasaplaryny ýapypdy.
Reuters agentliginiň habar bermegine görä, Pekin bu ädimi «meçew bermek» diýip atlandyrdy. Hytaý tarapy, eger bu ýagdaý dünýäde ýarymgeçirijiler önümçiliginde we üpjünçilik zynjyrynda täze çökgünlige sebäp bolsa, Niderlandlaryň muňa doly jogapkärçilik çekjekdigini duýdurdy.
Gapma-garşylyk 2024-nji ýylyň oktýabr aýynda başlandy. Şonda Niderlandlaryň hökümeti milli howpsuzlyk we Ýewropa Bileleşiginiň «tehnologik özygtyýarlylygy» sebäplerini öňe sürüp, kompaniýanyň hytaýly eýesi bolan Wingtech Technology holdingini dolandyryşdan çetleşdirip, kompaniýany öz gözegçiligine aldy.
Hytaý bolsa muňa jogap hökmünde Nexperia-nyň Hytaýdaky zawodlaryndan Ýewropa haryt eksport edilmegini bökdedi. Bu mikroshemalaryň dünýä boýunça awtoulaglaryň elektron ulgamlarynda örän giňden ulanylýandygy sebäpli, dessine degişli pudakda bökdençlikler ýüze çykyp başlady.
Nexperia dünýäniň çip bazaryndaky paýy 1 göteriminden hem az bolsa-da, ol häzirki zaman awtoulaglarynyň tas her birinde ulanylýan çalşyp bolmajak esasy şaýlary (tranzistorlary, diodlary we logiki shemalary) öndürýär.
Hytaýyň, Niderlandlaryň we Ýewropa Bileleşiginiň gatnaşmagynda ýagdaýy kadalaşdyrmak üçin edilýän synanyşyklar häzirlikçe miwesini bermeýär. Netijede dawa kazyýet işleri we taraplaryň biri-birini hyýanatçylykda aýyplamagy bilen dowam edýär.
