Sýurih uniwersitetiniň alymlary gidrogel implantatynyň kömegi bilen süňk dokumasyny dikeltmegiň täze tehnologiýasyny işläp düzdüler. Bu materialyň 97 göterimi suwdan ybarat bolup, ol želeni ýatladýan gurluşa eýedir.
Işläp düzmäniň esasy aýratynlygy — gidrogeliň süňküň içki gurluşyny gaýtalaýan çylşyrymly şekilleri emele getirip bilýänligidir.
Süňk döwüklerini we şikeslerini bejermekde ulanylýan adaty usullardan tapawutlylykda, täze material organizmiň dokumalary bilen ýakyn täsirleşmäge ukyply bio-ugurdaş gurluş bolup durýar. Tehnologiýa lazeriň kömegi bilen gidrogeli 500 nanometre çenli ýokary takyklykda we sekuntda 400 mm tizlikde «çap etmäge» mümkinçilik berýär. Geliň düzümindäki ýörite molekulalar lazer şöhlesiniň täsiri bilen gerekli ýerlerde derrew gataýar, şöhle düşmedik bölekleri bolsa ýumşaklygyna galyp, soňra aňsatlyk bilen aýrylýar.
Degişli barlaglar süňk öýjükleriniň bu gurluşa işjeň aralaşyp, süňk dokumasynyň möhüm bölegi bolan kollageni işläp çykaryp başlaýandygyny görkezdi. Bu oýlap tapyş eýýäm patentleşdirildi. Indiki tapgyrda gidrogeli «AO Research Institute Davos» instituty bilen bilelikde haýwanlarda synag etmek meýilleşdirilýär.
