Forbes 2026-njy ýylda ýaşy heniz 30-a ýetmedik milliarderleriň sanawyny düzdi. Sanawa jemi 35 adam girdi. Olaryň umumy baýlygy 92,4 milliard dollar möçberinde bahalandyrylýar.
Ýaşlaryň aglabasy öz baýlygyny miras arkaly, az sanlysy bolsa telekeçilik ukyplary bilen gazanypdyrdylar.
Reýtingde iň ýokary orunlary eýeleýän ýaş milliarderleriň 5-si bilen tanyş boluň:
Doganlar Del Wekkiolar (Italiýa)
24 ýaşly Luka Del Wekkio we 21 ýaşly Klemente 30 ýaşdan kiçi iň baý milliarderler hasaplanylýar. Doganlaryň hersinde 6,8 mlrd dollar bar. Olaryň baýlygy dünýäniň iň uly äýnek öndürijisi bolan EssilorLuxottica (Ray-Ban we Persol brendleriniň eýesi) kompaniýasynyň paýy bilen baglanyşyklydyr. Bu biznes olara kakasy Leonardo Del Wekkiodan miras galandyr.
Fon Baumbahlaryň maşgalasy (Germaniýa)
Nemes derman kärhanasy bolan Boehringer Ingelheim-yň mirasdüşerleri Maksimilianyň (28 ýaş), Katarinanyň (26 ýaş), Fransyň (24 ýaş) we Ýohannessiň (20 ýaş) hersi 6,6 mlrd dollara eýedir. 1885-nji ýylda düýbi tutulan bu kompaniýa maşgala biznesi hökmünde hereket edýär.
Kewin Dawid Lemann (Germaniýa)
23 ýaşly bu ýigit Ýewropanyň iň uly dermanhana we saglyk harytlary ulgamy bolan dm-drogerie markt-yň 50% paýyna eýelik edýär. Kakasy oňa bu paýy 2017-nji ýylda, Kewin bary-ýogy 14 ýaşyndaka eçilipdir. Häzir onuň baýlygy 4,9 mlrd dollara barabar.
Firoz we Zahan Mistri (Irlandiýa)
Doganlar Hindistanyň ägirt uly konglomeraty bolan Tata Sons-daky paýlaryny 2022-nji ýylda, kakalary Saýrus Mistri awtoheläkçilikde ýogalandan soň miras aldylar. Tata konglomeraty awtoulaglardan başlap, zergärçilik önümlerine çenli dürli ugurlarda işleýär.
Aleksandra Andresen (Norwegiýa)
2,5 mlrd dollaryň eýesi 29 ýaşly Aleksandranyň baýlygy maşgala maýa goýum kompaniýasy bolan Ferd bilen baglydyr. Maşgalanyň esasy maýasy 150 ýyldan gowrak dowam eden temmäki biznesiniň satylmagyndan soň emele geldi.
Dünýäniň iň ýaş milliarderi
Sanawdaky milliarderleriň iň ýaşy kiçisi — braziliýaly Ameli Foýgt Trežes boldy. Ol bary-ýogy 20 ýaşynda, baýlygy bolsa takmynan 1,1 milliard dollara barabar. Ameli atasy tarapyndan 1961-nji ýylda esaslandyrylan uly elektrik hereketlendirijilerini öndürýän WEG kompaniýasynyň 2% paýyna eýelik edýär.
