Moskwa döwlet lingwistik uniwersiteti (MDLU) türkmen dilini esasy bilim maksatnamalaryna girizmegi meýilleşdirýär. THP-niň habar bermegine görä, bu mesele ýokary okuw mekdebiniň rektory Irina Kraýewa bilen Türkmenistanyň Russiýa Federasiýasyndaky ilçihanasynyň geňeşçisi Serdar Durdyýewiň arasynda geçirilen duşuşykda ara alnyp maslahatlaşyldy.
Taraplar MDLU-nyň Garaşsyz Döwletleriň Arkalaşygynyň diller we medeniýet meseleleri boýunça binýatlyk guramasy hökmündäki işiniň çäginde hyzmatdaşlygy giňeltmek barada gürrüň etdi.
Duşuşygyň esasy mowzuklarynyň biri uniwersitetiň binýadynda Türkmen dili we medeniýeti merkezini döretmek boldy. Merkeziň açylyşyny Türkmenistanyň GDA-da başlyklyk etjek ýylyna gabat getirmek meýilleşdirilýär.
Bu merkeziň ýurtlaryň arasyndaky ynsanperwer gatnaşyklary ösdürmäge gönükdirilen bilim meýdançasyna hem-de aň-bilim çäreleriniň geçirilýän ýerine öwrülmegine garaşylýar.
Häzirki wagtda MDLU-da 40 sany daşary ýurt dili okadylýar. Türkmen dili ugrunyň açylmagy GDA ýurtlarynyň we ýakyn daşary ýurtlaryň dilleri we medeniýetleri kafedrasynyň ösüşinde täze tapgyr bolar.
Duşuşyga uniwersitetiň degişli bölümleriniň wekilleri, Türkmenistanyň ilçihanasynyň işgärleri we GDA-nyň Ýerine ýetiriji komitetiniň wekilleri hem gatnaşdy. Gatnaşyjylar täze bilim başlangyjynyň halkara hyzmatdaşlygy üçin hünärmenleri taýýarlamaga ýardam etjekdigine ynam bildirdi.
