2026-njy ýylyň 9-njy martynda Türkmenistanyň Daşary işler ministrliginde ministriň orunbasary S.Muhammetdurdyýew bilen Yrak Respublikasynyň Türkmenistandaky Ilçihanasynyň işleri wagtlaýyn ynanylan wekili Jassim Mohammed Al-Attaryň arasynda duşuşyk geçirildi. Bu barada ministrligiň metbugat gullugy habar berýär.
Türkmen tarapy Yrak Respublikasynyň Aşgabatda öz diplomatik wekilhanasyny açmak baradaky kararyna minnetdarlyk bildirip, Ilçihananyň doly derejede işlemegi üçin ähli zerur goldawyň beriljekdigini tassyklady.
Gepleşikleriň dowamynda täze Ilçihananyň açylmagynyň iki ýurduň arasyndaky syýasy-diplomatik, söwda-ykdysady we medeni-ynsanperwer gatnaşyklary täze derejä götermäge hyzmat etjekdigi bellenildi.
Duşuşykda ikitaraplaýyn hyzmatdaşlygyň, şol sanda 2025-nji ýylyň oktýabrynda Bagdatda geçirilen syýasy geňeşmeleriň ähmiýeti nygtalyp, işewürlik, ylym, bilim we sport ulgamlarynda täze taslamalary amala aşyrmagyň mümkinçilikleri ara alnyp maslahatlaşyldy.
2009-njy ýyldan bäri ýola goýlan diplomatik gatnaşyklaryň çäklerinde iki dostlukly ýurduň halkara giňişliginde hem biri-birini işjeň goldaýandygy aýratyn bellenildi. Bu diplomatik ädim Türkmenistan bilen Yragyň arasyndaky köpýyllyk dostlukly gatnaşyklaryň taryhynda möhüm ähmiýete eýedir.
