YouTube platformasy özüniň ykjam goşundysynda ulanyjylaryň biri-biri bilen göni habarlaşmagyna mümkinçilik berýän şahsy habarlaşyk funksiýasyny täzeden synagdan geçirip başlady. Bu täzelik häzirki wagtda Ýewropanyň 31 döwletinde elýeterlidir.
Aslynda bu hyzmat ilkinji gezek 2017-nji ýylda hödürlenip, iki ýyldan soň ýapylypdy. 2025-nji ýylyň noýabryndan başlap bolsa, Polşa we Irlandiýa ýaly ýurtlarda synag hökmünde dikeldildi we kem-kemden beýleki ýewropa ýurtlaryna hem ýaýradyldy.
Şonuň bilen birlikde, YouTube dekabr aýynda ulanyjylaryň 2025-nji ýyldaky işjeňligini seljerýän 12 sany maglumat kartyndan ybarat bolan «Recap» («Ýylyň jemleri») hasabatyny hödürledi. Bu hasabatda ulanyjylar özleriniň iň köp tomaşa eden kanallaryny, üýtgän endiklerini we saz gyzyklanmalaryny görüp bildiler.
Platformanyň ýene bir möhüm täzeligi bolsa, ýanwar aýynda yglan edilen ata-eneler üçin gözegçilik ulgamydyr. Olar bu ulgam arkaly çagalarynyň Shorts diýlip atlandyrylýan gysga wideolary tomaşa etmek wagtyna 15 minutdan 2 sagada çenli günlük çäklendirme goýup ýa-da bu formaty tutuşlygyna petikläp bilýärler.
